UN PROYEUTO NEZESARIO TA ARAGÓN

En o branquil d'o sieglo XXI, bi ha un gran desencanto en a soziedá aragonesa. Y no i mancan razons. Ni a Unión Uropea, ni l'Estau d'as Autonomías han suposau enantos importans en as reyalizazions materials u en o poder politico alcanzau por a nuestra Comunidá autonoma.

A contrario que o suzediu en atras nazionalidaz, ta las que as zagueras bente añadas han senificau fundas trasformazions sozials y politicas, mos atrebimos a asigurar que en Aragón continan pendiens de resoluzión gran parti d'os problemas que esistiban en l'empezipio d'a democrazia.

Güei Aragón se troba en o contorniello d'afirmar a suya nazionalidá u de disparixer como pueblo esferenziau, tal como en yera dica tiempos reziens.

Dende Iniziatiba Aragonesa, creyemos que ye plegau l'inte de que Aragón se'n debante como pueblo bibo, como nazionalidá emerxén sin garra complexo. Mos i chugamos a nuestra perbibenzia y ista afirmazión afeuta a o politico, o sozial, o economico, a la finitiba a o nuestro proyeuto de bida en común.

Semo combenzius de que ista faina de recuperazión d'a nuestra identidá y autoestima pende nomás que de nusatros mesmos. estaría prou con que considerásenos como cualcosa nezesaria o feito de que ta estar unibersals cal tener una cultura y radizes propias y que formamos parti d'una nazionalidá, l'aragonesa, dende a cuala puede traszender-se enta tot o demás.

En Iniziatiba Aragonesa pensamos que en aragón ye indispensable definir y enchegar un proyeuto nazionalista que siga capaz d'integrar a la más gran parti d'os aragoneses y aragonesas y que siga asumible por atras fuerzas politicas aragonesistas. O nuestro proyeuto s'emplantilla sobre un nazionalismo aragonés moderno, solidario, rispetuoso con as libertaz, costruyiu con a capeza y con o corazón, que concare l'esbenidero con rasmia y optimismo, sin complexos y sin zentrar-se sólo que en o glorioso pasau nuestro.

Os alazez d'Iniziatiba Aragonesa son dos:
1.- Semos un partiu nazionalista aragonés.
2.- Semos un partiu de zentro.

Ta nusatros, l'ideyario d'un partiu debe serbir como referenzia, debe estar a guía que mos pribe desapartar-mos de l'alazetal. Manimenos, nunca debe tornar-se en cualcosa rixida y inmutable, sino que debe contrimostrar-se en o diya a diya, con posturas y autituz eficazes debán d'os problemas cutianos d'a soziedá. A la finitiba, l'ideyario d'un partiu debe balurar-se por o que fa y no por o que diz.

En Iniziatiba mos cuacaría dixar platero cómo entendemos o que senifica estar nazionalistas y estar de zentro.

Ta nusatros estar nazionalistas aragoneses ye tanto como estar cosziens de que Aragón ye una nazionalidá que se troba en claro prozeso de disparixión y asumir a nezesidá de cambear ista reyalidá. As nazionalidaz no son eternas y pueden disparixer si no se protexen.

L'oxetibo d'os aragoneses nazionalistas estará la recuperazión de tot o que define y costituye a nuestra nazionalidá, asinas como alcanzar o marco churidico que atorgue tot o poder politico nezesario ta poder siguir esistindo como pueblo.

Ye posible que l'Estau ideyal ta consiguir ixas fins siga l'Estau federal, a o cualo cutio aspiraremos, pero l'autual Estau d'as Autonomías puede estar prou ta afirmar a nazionalidá aragonesa.

Cal fer notar que, ta Iniziatiba, si bien ye alazetal a recuperazión d'a nuestra identidá, isto no costituye una fin en si mesma. A custión ye recuperar a nazionalidá de bez que s'alcanza una soziedá solidaria y armonicamén desembolicada en o sozial y o material.

Ta os ombres y mullers d'Iniziatiba, estar de zentro senifica que, si bien compartimos belunos d'os prenzipios d'as dos tiorías economicas y politicas más importans d'o nuestro sieglo, o liberalismo y o sozialismo, creyemos posible una bía entremeya, alexada de dogmatismos, capaz d'abordar os problemas d'a nuestra soziedá alportando-ie soluzions, que bellas begadas se calificarán de cucha y belatras de dreita. En iste sentiu, confitamos en a iniziatiba d'as presonas como motor de desembolique indibidual y coleutibo, pero no renunziamos a o papel de l'Estau como guaranziador d'os dreitos alazetals en aspeutos tan importans como sanidá, educazión u prestazions sozials.

Semos combenzius de que o nustro proyeuto ye compartiu por una gran mayoría d'os aragoneses, porque buscamos más o que mos chune que o que mos desepara.

En Iniziatiba, l'aragonesismo estará parti sustanzial d'o conteniu ideyoloxico d'o nuestro proyeuto politico y nunca s'emplegará como tautica oportunista ta consiguir atras fins. A la finitiba, queremos costruyir un proyeuto que faiga politica ta Aragón entero, que sirba a Aragón y que no se sirba d'él.

Queremos fer reyalidá un proyeuto politico en o que a democrazia interna siga una cutiana reyalidá ta que as dezisions de toz balgan más que os umanos intreses indibiduals.

Os ombres y mullers d'Iniziatiba Aragonesa mos embrecamos a fer reyalidá iste proyeuto porque Aragón lo amenista y porque dica agora no esistiba.